The Harley lyrics
[Ms. Harley 2253]
(c. 1310)


Unknown authors

E-Text: University of Virginia Library Electronic Text Center.

Source: see below


Contents

Brook 1; Ker 24b

Brook 2; Ker 27

Brook 3; Ker 28

Brook 4; Ker 29

Brook 5; Ker 30

Brook 6; Ker 33

Brook 7; Ker 34

Brook 8; Ker 35

Brook 9; Ker 36

Brook 10; Ker 41

Brook 11; Ker 43

Brook 12; Ker 44

Brook 13; Ker 45

Brook 14; Ker 46

Brook 15; Ker 50

Brook 16; Ker 51

Brook 17; Ker 52

Brook 18; Ker 53

Brook 20; Ker 60

Brook 21; Ker 61

Brook 22; Ker 62

Brook 23; Ker 63

Brook 24; Ker 64

Brook 25; Ker 65

Brook 26; Ker 66

Brook 27; Ker 67

Brook 28; Ker 69

Brook 29; Ker 73

Brook 30; Ker 81

Brook 31; Ker 92

Brook 32 ; Ker 93

 

About the electronic version

About the print version

Revisions to the electronic version

 


 

Brook 1; Ker 24b


-29-

001: Erþe toc of erþe erþe wyþ woh
002: Erþe oþer erþe to þe erþe droh
003: Erþe leyde erþe in erþene þroh
004: þo heuede erþe of erþe erþe ynoh

 

Brook 2; Ker 27


001: Middelerd for mon wes mad
002: vnmihti aren is meste mede
003: þis hedy haþ on honde yhad
004: þat heuene hem is hest to hede
005: Icherde a blisse budel vs bad
006: þe dreri domesdai to drede
007: of sunful sauhting sone be sad
008: þat derne doþ þis derne dede
009: þah he ben derne done
010: þis wrakeful werkes vnder wede
011: in soule soteleþ sone
012: sone is sotel as ich ou sai
013: þis sake alþah hit seme suete
014: þat i:telle a poure play
015: þat furst is feir & seþþe vnsete
016: þis wilde wille went awai
017: wiþ mone & mournyng muchel vnmete
-30-

018: þat liueþ on likyng out of lay
019: his hap he deþ ful harde on hete
020: a3eyn3 he howeþ henne
021: alle is þriuene þewes þrete
022: þat þenkeþ nout on þenne
023: a3eynes þenne vs þreteþ þre
024: 3ef he beþ þryuen & þowen in þeode
025: vr soule bonc so broerli be
026: as berne best þat bale forbeode
027: þat wole wihtstonden streynþe of þeo
028: is rest is reued wiþ þe reode
029: fyth of oþer ne darþ he floc
030: þat fleishshes faunyng furst foreode
031: þat falsist is of fyue
032: 3ef we leueþ eny leode
033: werryng is worst of wyue
034: wyues wille were ded wo
035: 3ef he is wicked forte welde
036: þat burst shal bete for hem bo
037: he shal him burewen þah he hire belde
038: by body ant soule y:sugge al so
039: þat some beoþ founden vnder felde
040: þat haþ to fere is meste fo
041: of gomenes he mai gon al gelde
042: ant sore ben fered on folde
043: lest he to harmes helde
044: ant happes hente vnholde
045: hom vnholdest her is on
046: wiþouten helle ase ich hit holde
047: so fele bueþ founden monnes fon
048: þe furst of hem biforen ytolde
049: þer afterward þis worldes won
050: wiþ muchel vnwynne vs woren wolde
051: sone beþ þis gomenes gon
052: þat makeþ vs so brag & bolde
053: ant biddeþ vs ben blyþe
054: an ende he casteþ ous fol colde
055: in sunne & serewe syþe
-31-

056: In sunne & sorewe y am seint
057: þat siweþ me sosully sore
058: my murþe is al wiþ mournyng meind
059: ne may ich myþen hit namore
060: when we beþ wiþ þis world forwleynt
061: þat we ne lustneþ lyues lore
062: þe fend in fyht vs fynt so feynt
063: we falleþ so flour when hit is frore
064: for folkes fader al fleme
065: Wo him wes ywarpe 3ore
066: þat Crist nul nowyht queme
067: To queme crist we weren ycore
068: ant kend ys craftes forte knowe
069: Leue we nout we buen forlore
070: in lustes þah we lyggen lowe
071: We shule aryse vr fader byfore
072: þah fon vs fallen vmbe þrowe
073: to borewen vs alle he wes ybore
074: þis bonnyng when him bemes blowe
075: he byt vs buen of hyse
076: ant on ys ryhthond hente rowe
077: Wyþ ryht wysemen to aryse

 

Brook 3; Ker 28


001: Ichot a burde in a bour ase beryl so bryht
002: ase saphyr in seluer semly on syht
003: ase iaspe þe gentil þat lemeþ wiþ lyht
004: ase gernet in golde & ruby wel ryht
005: ase onycle he ys on yholden on hyht
006: ase diamaund þe dere in day when he is dyht
007: he is coral ycud wiþ cayser ant knyht
008: ase emeraude amorewen þis may haueþ myht
009: þe myht of þe margarite haueþ þis mai mere
010: For charbocle ich hire chos bi chyn & by chere
011: hire rode is ase rose þat red is on rys
012: wiþ lilye white leres lossum he is
013: þe primerole he passeþ paruenke of pris
014: wiþ alisaundre þareto ache & anys
015: coynte ase columbine such hire cunde ys
016: glad vnder gore in gro & in grys
-32-

017: he is blosme opon bleo brihtest vnder bis
018: wiþ celydoyne ant sauge ase þou þiself sys
019: þat syht vpon þat semly to blis he is broht
020: he is solsecle to sauue ys forsoht
021: he is papeiai in pyn þat beteþ me my bale
022: to trewe tortle in a tour y telle þe mi tale
023: he is þrustle þryuen in þro þat singeþ in sale
024: þe wilde laueroc ant wolc & þe wodewale
025: he is faucoun in friht dernest in dale
026: ant wiþ eueruch a gome gladest in gale
027: From weye he is wisist in to wyrhale
028: hire nome is in a:note of þe nyhtegale
029: In annote is hire nome nempneþ hit non
030: whose ryht redeþ roune to Johon.
031: muge he is ant mondrake þouh miht of þe mone
032: trewe triacle ytold wiþ tonges in trone
033: such licoris mai leche from lyne to lone
034: such sucre mon secheþ þat saueþ men sone
035: bliþe yblessed of crist þat bayeþ me mi bone
036: when derne dede is in dayne derne are done
037: ase gomyl in geue grene is þe grone
038: ase quibibe & comyn cud is in crone
039: Cud comyn in court canel in cofre
040: wiþ gyngyure & sedewale & þe gylofre
041: he is medierne of miht mercie of mede
042: Rekene ase regnas resoun to rede
043: Trewe ase tegeu in tour ase wyrwein in wede
044: baldore þen byrne þat of þe bor bede
045: Ase Wylcadoun he is wys dohty of dede
046: Feyrore þen floyres folkes to fede
047: Cud ase cradoc in court carf þe brede
048: hendore þen hilde þat haueþ me to hede
049: he haueþ me to hede þis hendy anon
050: gentil ase ionas heo ioyeþ wiþ Ion
-33-

 

Brook 4; Ker 29


001: Bytuene mersh & aueril.
002: when spray biginneþ to springe
003: þe lutel foul haþ hire wyl
004: on hyre lud to synge
005: Ich libbe in louelonginge
006: for semlokest of alle þynge.
007: he may me blisse bringe
008: icham in hire baundoun
009: An hendy hap ichabbe yhent
010: ichot from heuene it is me sent
011: from alle wymmen mi loue is lent
012: & lyht on alysoun
013: on heu hire her is fayr ynoh
014: hire browe broune hire e3e blake
015: wiþ lossum chere he on me loh
016: wiþ middel smal & wel ymake
017: bote he me wolle to hire take
018: forte buen hire owen make
019: longe to lyuen ichulle forsake
020: & feye fallen adoun
021: an hendy hap &c
022: nihtes when y wende & wake
023: forþi myn wonges waxeþ won.
024: leuedi al for þine sake
025: longinge is ylent me on.
026: In world nis non so wytermon.
027: þat al hire bounte telle con
028: hire swyre is whittore þen þe swon
029: & feyrest may in toune
030: An hend &c
031: Icham for wolwyng al forwake
032: wery so water in wore
033: lest eny reue me my make
034: ychabbe y3yrned 3ore
035: Betere is þolien whyle sore
036: þen mournen euermore
037: geynest vnder gore
038: herkne to me roun.
039: An hendi &c
-34-

 

Brook 5; Ker 30


001: Wiþ longyng y am lad
002: on molde y waxe mad
003: a maide marreþ me
004: y:grede y:grone vnglad
005: for selden y am sad
006: þat semly forte se
007: leuedi þou rewe me
008: to rouþe þou hauest me rad
009: be bote of þat y bad
010: my lyf is long on þe
011: leuedy of alle londe
012: les me out of bonde
013: broht icham in wo
014: haue:resting on honde
015: & sent þou me þi sonde
016: sone er þou me slo
017: my reste is wiþ þe ro
018: þah men to me han onde
019: to loue nuly noht wonde
020: ne lete for:non of þo
021: leuedi wiþ al my miht
022: my loue is on þe liht
023: to menske when y:may
024: þou rew & red me ryht
025: to deþe þou hauest me diht
026: y de3e longe er me day
027: þou leue vpon mi lay
028: treuþe ichaue þe plyht
029: to done þat ich haue hyht
030: whil mi lif leste may
031: lylie whyt hue is
032: hire rode so rose on rys
033: þat reueþ me mi rest
034: wymmon war & wys
035: of prude hue bereþ þe pris
036: burde on of þe best
037: þis wommon woneþ by west
038: brihtest vnder bys
039: heuene y:tolde al his
040: þat o nyht were hire gest
-35-

 

Brook 6; Ker 33


001: Weping haueþ myn wonges wet
002: for wilked werk ant wone of wyt
003: vnbliþe y be til y ha bet
004: bruches broken ase bok byt
005: of leuedis loue þat y ha let
006: þat lemeþ al wiþ luefly lyt
007: ofte in song y haue hem set
008: þat is vnsemly þer hit syt
009: hit syt & semeþ noht
010: þer hit ys seid in song
011: þat y haue of hem wroht
012: ywis hit is al wrong
013: al wrong y wrohte for a wyf
014: þat made vs wo in world ful wyde
015: heo rafte vs alle richesse ryf
016: þat durþe vs nout in reynes ryde
017: a styþye stunte hire sturne stryf
018: þat ys in heouene hert in hyde
019: In hire lyht on ledeþ lyf
020: & shon þourh hire semly syde
021: þourh hyre side he shon
022: ase sonne doþ þourh þe glas
023: wommon nes wicked non
024: seþþe he ybore was
025: wycked nis non þat y wot
026: þat durste for werk hire wonges wete
027: alle heo lyuen from last of lot
028: & are al hende ase hak in chete
029: forþi on molde y waxe mot
030: þat y sawes haue seid vnsete
031: my fykel fleish mi falsly blod
032: on feld hem feole y falle to fete
033: to fet y:falle hem feole
034: for falslek fifte folde
035: of alle vntrewe on tele
036: wiþ tonge ase y her tolde
-36-

037: þah told beon tales vntoun in toune
038: such tiding mei tide y nul nout teme
039: of brudes bryht wiþ browes broune
040: or blisse heo beyen þis briddes breme
041: In rude were roo wiþ hem roune
042: þat hem mihte henten ase him were heme
043: nys kyng cayser ne clerk wiþ croune
044: þis semly seruen þat me ne may seme
045: semen him may on sonde
046: þis semly seruen so
047: boþe wiþ fet ant honde
048: for on þat vs warp from wo
049: nou wo in world ys went away
050: & weole is come ase we wolde
051: þourh a mihti methful:mai
052: þat ous haþ cast from cares colde
053: euer wymmen ich herie ay
054: & euer in hyrd wiþ hem ich holde
055: ant euer at neode y nyckenay
056: þat y ner nemnede þat heo nolde
057: y nolde & nullyt noht
058: for noþyng nou a nede
059: soþ is þat y of hem ha wroht
060: as Richard erst con rede
061: Richard rote of resoun ryht
062: rykening of rym ant ron
063: of maidnes meke þou hast myht
064: on molde y holde þe murgest mon
065: cunde comely ase a knyht
066: clerk ycud þat craftes con
067: In vch an hyrd þyn aþel ys hyht
068: & vch an aþel þin hap is on
069: hap þat haþel haþ hent
070: wiþ hendelec in halle
071: selþe be hem sent
072: in londe of leuedis alle
-37-

 

Brook 7; Ker 34


001: Mosti ryden by rybbesdale
002: wilde wymmen forte wale
003: ant welde wuch ich wolde
004: founde were þe feyrest on
005: þat euer wes mad of blod ant bon
006: in boure best wiþ bolde
007: Ase sonnebem hire bleo ys briht
008: in vche londe heo leomeþ liht
009: þourh tale as mon me tolde
010: þe lylie lossum is ant long
011: wiþ riche rose ant rode among
012: a fyld or fax to folde
013: Hire hed when ich biholde apon
014: þe sonnebe'e'm aboute noon
015: me þohte þat y se3e
016: hyre (ey3en) aren grete ant gray ynoh
017: þ[at] lussom when heo on me loh
018: ybend wax eyþer bre3e
019: þe mone wiþ hire muchele maht
020: ne leneþ non such lyht anaht
021: þat is in heouene he3e
022: ase hire forhed doþ in day
023: for wham þus muchel y mourne may
024: for duel to deþ y drey3e
025: Heo haþ browes bend an heh
026: whyt bytuene ant nout to neh
027: lussum lyf heo ledes
028: hire neose ys set as hit wel semeþ
029: y de3e for deþ þat me demeþ
030: hire speche as spices spredeþ
031: hire lockes lefly aren & longe
032: for sone he mihte hire murþes monge
033: wiþ blisse when hit bredes
034: hire chyn ys chosen & eyþer cheke
035: whit ynoh & rode on eke
036: ase roser when hit redes
-38-

037: Heo haþ a mury mouht to mele
038: wiþ lefly rede lippes lele
039: romaun3 forte rede
040: hire teht aren white ase bon of whal
041: euene set ant atled al
042: ase hende mowe taken hede
043: swannes swyre swyþe wel ysette
044: a sponne lengore þen ymette
045: þat freoly ys to fede
046: me were leuere kepe hire come
047: þen beon pope & ryde in rome
048: styþes vpon stede
049: When y byholde vpon hire hond
050: þe lylie white lef in lond
051: best heo mihte beo
052: eyþer arm an elne long
053: baloygne mengeþ al bymong
054: ase baum ys hire bleo
055: fyngres heo haþ feir to folde
056: myhte ich hire haue & holde
057: in world wel were me
058: hyre tyttes aren an vnderbis
059: as apples tuo of parays
060: ouself 3e mowen seo
061: Hire gurdel of bete gold is al
062: vmben hire middel smal
063: þat trikeþ to þe to
064: al whiþ rubies on a rowe
065: wiþinne coruen craft to knowe
066: ant emeraudes mo
067: þe bocle is al of whalles bon
068: þer wiþinne stont a ston
069: þat warneþ men from wo
070: þe water þat hit wetes yn
071: ywis hit worþeþ al to wyn
072: þat se3en seyden so
073: Heo haþ a mete myddel smal
074: body & brest wel mad al
075: ase feynes wiþoute fere
-39-

076: eyþer side soft ase sylk
077: whittore þen þe moren mylk
078: wiþ leofly lit on lere
079: al þat ich ou nempne noht
080: hit is wonder wel ywroht
081: ant elles wonder were
082: he myhte sayen þat crist hym se3e
083: þat myhte nyhtes neh hyre le3e
084: heuene he heuede here

 

Brook 8; Ker 35


001: In a fryht as y con fare fremede
002: y founde a wel feyr fenge to fere
003: heo glystnede ase gold when hit glemede
004: nes ner gome so gladly on gere
005: y wolde wyte in world who hire kenede
006: þis burde bryht 3ef hire wil were
007: heo me bed go my gates lest hire gremede
008: ne kepte heo non henyng here
009: yhere þou me nou hendest in helde
010: nauy þe none harmes to heþe
011: casten y wol þe from cares & kelde
012: comeliche y wol þe nou cleþe
013: cloþes y haue on forte caste
014: such as y may weore wiþ wynne
015: betere is were þunne boute laste
016: þen syde robes ant synke into synne
017: haue 3e or wyl 3e waxeþ vnwraste
018: afterward or þonk be þynne
019: betre is make forewardes faste
020: þen afterward to mene & mynne
021: of munnyng ne munte þou namore
022: of menske þou were wurþe by my myht
023: y:take an hond to holde þat y:hore
024: of al þat y þe haue byhyht
025: why ys þe loþ to leuen on my lore
026: lengore þen my loue were on þe lyht
027: anoþer myhte 3erne þe so 3ore
028: þat nolde þe noht rede so ryht
-40-

029: such reed me myhte spaclyche reowe
030: when al my ro were me atraht
031: sone þo woldest vachen an newe
032: ant take anoþer wiþinne ny3e naht
033: þenne mihti hengren on heowe
034: in vch an hyrd ben hated & forhaht
035: ant ben ycayred from alle þat y:kneowe
036: & bede cleuyen þer y hade claht
037: betere is taken a comeliche y cloþe
038: in armes to cusse & to cluppe
039: þen a wrecche y wedded so wroþe
040: þah he me slowe ne myhti him asluppe
041: þe beste red þat y:con to vs boþe
042: þat þou me take ant y þe toward huppe
043: þah y swore by treuþe & oþe
044: þat god haþ shaped mey non at luppe
045: mid shupping ne mey hit me ashunche
046: nes y neuer wycche ne wyle
047: ych am a maide þat me ofþunche
048: luef me were gome boute gyle

 

Brook 9; Ker 36


001: A wayle whyt ase whalles bon
002: a grein in golde þat godly shon
003: a tortle þat min herte is on
004: in tonues trewe
005: hire gladshipe nes neuer gon
006: whil y may glewe
007: when heo is glad
008: of al þis world namore y:bad
009: þen beo wiþ hire myn one bistad
010: wiþ oute strif
011: þe care þat icham yn ybrad
012: y wyte a wyf
013: A wyf nis non so worly wroht
014: when heo ys blyþe to bedde ybroht
015: wel were him þat wiste hire þoht
016: þat þryuen & þro
017: wel y wot heo nul me noht
018: myn herte is wo
-41-

019: hou shal þat lefly syng
020: þat þus is marred in mournyng
021: heo me wol to deþe bryng
022: longe er my day
023: gret hire wel þat swete þing
024: wiþ e3enen gray
025: hyre he3e haueþ wounded me ywisse
026: hire bende browen þat bringeþ blisse
027: hire comely mouth þat mihte cusse
028: in muche murþe he were
029: y wolde chaunge myn for his
030: þat is here fere
031: wolde hyre fere beo so freo
032: ant wurþes were þat so myhte beo
033: al for on y wolde 3eue þreo
034: wiþoute chep
035: from helle to heuene ant sonne to see
036: nys non so 3e,e,p
037: ne half so freo
038: wose wole of loue be trewe do lystne me
039: herkneþ me y ou telle
040: in such wondryng for wo y welle
041: nys no fur so hot in helle
042: al to mon
043: þat loueþ derne ant darn:out telle
044: whet him ys on
045: Ich vnne hire wel ant heo me wo
046: ycham hire frend ant heo my fo
047: me þuncheþ min herte wol breke atwo
048: for sorewe ant syke
049: in godes greting mote heo go
050: þat wayle whyte
051: Ich wolde ich were a þrestelcok
052: a bountyng oþer a lauercok
053: swete bryd
054: bituene hire curtel ant hire smok
055: y wolde ben hyd
-42-

 

Brook 10; Ker 41


001: Of a mon Matheu þohte
002: þo he þe wyn3ord whrohte
003: ant wrot hit on ys boc
004: In marewe men he sohte
005: at vnder mo he brohte
006: ant nom ant non forsoc
007: At mydday ant at non
008: he sende hem þider fol:son
009: to helpen hem wiþ hoc
010: huere foreward wes to fon
011: so þe furmest heuede ydon
012: ase þe erst vndertoc
013: At euesong euen neh
014: ydel men 3et he seh
015: lomen habbe an honde
016: to hem he sayde an heh
017: þat suyþe he wes vndreh
018: so ydel forte stonde
019: so hit wes bistad
020: þat nomon hem ne bad
021: huere lomes to fonde
022: anon he was byrad
023: to werk þat he hem lad
024: for nyht nolde he nout wonde
025: huere hure anyht hue nome
026: he þat furst ant last come
027: a peny brod & bryht
028: þis oþer swore alle & some
029: þat er were come wiþ lome
030: þat so nes hit nout ryht
031: ant swore somme vnsaht
032: þat hem wes werk bytaht
033: longe er hit were lyht
034: for ryht were þat me raht
035: þe mon þat al day wraht
036: þe more mede anyht
-43-

037: þenne seiþ he ywis
038: why naþ nout vchmon his
039: holdeþ nou or pees
040: Away þou art vnwis
041: tak al þat þin ys
042: ant fare ase foreward wees
043: 3ef y may betere beode
044: to mi latere leode
045: to leue nam y nout lees
046: to alle þat euer hider eode
047: to do today my neode
048: Ichulle be wraþþelees
049: þis world me wurcheþ wo
050: rooles ase þe roo
051: y sike for vnsete
052: ant mourne ase men doh mo
053: for doute of foule fo
054: hou y my sunne may bete
055: þis mon þat Matheu 3ef
056: a peny þat wes so bref
057: þis frely folk vnfete
058: 3et he 3yrnden more
059: ant saide he come wel 3ore
060: ant gonne is loue forlete

 

Brook 11; Ker 43


001: Lenten ys come wiþ loue to toune
002: wiþ blosmen & wiþ briddes roune
003: þat al þis blisse bryngeþ
004: dayese3es in þis dales
005: notes suete of nyhtegales
006: vch foul song singeþ
007: þe þrestelcoc him þreteþ oo
008: away is huere wynter wo
009: when woderoue springeþ
010: þis foules singeþ ferly fele
011: ant wlyteþ on huere wynter wele
012: þat al þe wode ryngeþ
-44-

013: þe rose rayleþ hire rode
014: þe leues on þe lyhte wode
015: waxen al wiþ wille
016: þe mone mandeþ hire bleo
017: þe lilie is lossom to seo
018: þe fenyl & þe fille
019: wowes þis wilde drakes
020: Miles murgeþ huere makes
021: ase strem þat strikeþ stille
022: Mody meneþ so doh mo
023: Ichot ycham on of þo
024: for loue þat likes ille
025: þe mone mandeþ hire lyht
026: so doþ þe semly sonne bryht
027: when briddes singeþ breme
028: deawes donkeþ þe dounes
029: deores wiþ huere derne rounes
030: domes forte deme
031: wormes woweþ vnder cloude
032: wymmen waxeþ wounder proude
033: so wel hit wol hem seme
034: 3ef me shal wonte wille of on
035: þis wunne weole y wole forgon
036: ant wyht in wode be fleme

 

Brook 12; Ker 44


001: In may hit murgeþ when hit dawes
002: In dounes wiþ þis dueres plawes
003: ant lef is lyht on lynde
004: blesmes bredeþ on þe bowes
005: al þis wylde wyhtes wowes
006: so wel ych vnderfynde
007: y not non so freoli flour
008: ase ledies þat beþ bryht in bour
009: wiþ loue who mihte hem bynde
010: so worly wymmen are by west
011: one of hem ich herie best
012: from Irlond into ynde
-45-

013: wymmen were þe beste þing
014: þat shup oure he3e heuene kyng
015: 3ef feole false nere
016: heo beoþ to rad vpon huere red
017: to loue þer me hem lastes bed
018: when heo shule fenge fere
019: Lut in londe are to leue
020: þah me hem trewe trouþe 3eue
021: for tricherie to 3ere
022: when trichour haþ is trouþe yplyht
023: byswyken he haþ þat suete wyht
024: þah he hire oþes swere
025: wymmon war þe wiþ þe swyke
026: þat feir ant freoly ys to fyke
027: ys fare is o to founde
028: so wyde in world ys huere won
029: in vch a toune vntrewe is on
030: from Leycestre to Lounde
031: of treuþe nis þe trichour noht
032: bote he habbe is wille ywroht
033: at steuenyng vmbe stounde
034: ah feyre leuedis be on war
035: to late comeþ þe 3eynchar
036: when loue ou haþ ybounde
037: wymmen bueþ so feyr on hewe
038: ne trowy none þat nere trewe
039: 3ef trichour hem ne tahte
040: ah feyre þinges freoly bore
041: when me ou woweþ beþ war bifore
042: whuch is worldes ahte
043: al to late is send a3eyn
044: when þe ledy liht byleyn
045: ant lyueþ by þat he lahte
046: ah wolde Lylie leor in lyn
047: yhere leuely lores myn
048: wiþ selþe we weren sahte
-46-

 

Brook 13; Ker 45


001: He3e louerd þou here my bone
002: at madest middelert & mone
003: ant mon of murþes munne
004: trusti kyng ant trewe in trone
005: þat þou be wiþ me sahte sone
006: asoyle me of sunne
007: Fol ich wes in folies fayn
008: In luthere lastes y am layn
009: þat makeþ myn þryftes þunne
010: þat semly sawes wes woned to seyn
011: Nou is marred al my meyn
012: away is al my wunne
013: vnwunne haueþ myn wonges wet
014: þat makeþ me rouþes rede
015: Ne semy nout þer y am set
016: þer me calleþ me fulle flet
017: ant waynoun wayteglede
018: Whil ich wes in wille wolde
019: In vch a bour among þe bolde
020: yholde wiþ þe heste
021: Nou y may no fynger folde
022: Lutel loued ant lasse ytolde
023: yleued wiþ þe leste
024: A goute me haþ ygreyþed so
025: ant oþer eueles monye mo
026: y not whet bote is beste
027: þar er wes wilde ase þe ro
028: nou yswyke y mei nout so
029: hit siweþ me so faste
030: Faste y wes on horse heh
031: ant werede worly wede
032: Nou is faren al my feh
033: wiþ serewe þat ich hit euer seh
034: a staf ys nou my stede
035: When y se steden styþe in stalle
036: ant y go haltinde in þe halle
037: Myn huerte gynneþ to helde
038: þat er wes wildest inwiþ walle
039: nou is vnder fote yfalle
040: ant mey no fynger felde
-47-

041: þer ich wes luef icham ful loht
042: ant alle myn godes me atgoht
043: myn gomenes waxeþ gelde
044: þat feyre founden me mete & cloht
045: hue wrieþ awey as hue were wroht
046: such is euel ant elde
047: Euel ant elde ant oþer wo
048: foleweþ me so faste
049: Me þunkeþ myn herte brekeþ a tuo
050: suete god whi shal hit swo
051: hou mai hit lengore laste
052: whil mi lif wes luþer & lees
053: glotonie mi glemon wes
054: wiþ me he wonede a while
055: prude wes my plowe fere
056: lecherie my lauendere
057: wiþ hem is gabbe & gyle
058: Coueytise myn keyes bere
059: Niþe ant onde were mi fere
060: þat bueþ folkes fyle
061: Lyare wes mi latymer
062: sleuthe & slep mi bedyuer
063: þat weneþ me vnbe while
064: vmbe while y am to whene
065: when y shal murþes meten
066: Monne mest y am to mene
067: lord þat hast me lyf to lene
068: such lotes lef me leten
069: such lyf ich haue lad fol 3ore
070: merci louerd y nul namore
071: bowen ichulle to bete
072: syker hit siweþ me ful sore
073: gabbes les & luþere lore
074: sunnes bueþ vnsete
075: godes heste ne huld y noht
076: bote euer a3eyn is wille ywroht
077: mon lereþ me to lete
078: such serewe haþ myn sides þurhsoht
079: þat al y weolewe away to noht
080: when y shal murþes mete
-48-

081: To mete murþes ich wes wel fous
082: ant comely mon ta calle
083: y:sugge by oþer ase bi ous
084: alse ys hirmon halt in hous
085: ase heued hount in halle
086: dredful deþ why wolt þou dare
087: bryng þis body þat is so bare
088: ant yn bale ybounde
089: Careful mon ycast in care
090: y falewe as flour y let forþfare
091: ychabbe myn deþes wounde
092: murþes helpeþ me no more
093: help me lord er þen ich hore
094: ant stunt my lyf a stounde
095: þat 3okkyn haþ y3yrned 3ore
096: Nou hit sereweþ him ful sore
097: ant bringeþ him to grounde
098: to grounde hit haueþ him ybroht
099: whet ys þe beste bote
100: bote heryen him þat haht vs boht
101: vre lord þat al þis world haþ wroht
102: ant fallen him to fote
103: Nou icham to deþe ydyht
104: ydon is al my dede
105: god vs lene of ys lyht
106: þat we of soutes habben syht
107: ant heuene to mede amen.

 

Brook 14; Ker 46


001: Blow northerne wynd
002: sent þou me my suetyng
003: blow norþerne wynd
004: blou blou blou
005: Ichot a burde in boure bryht
006: þat sully semly is on syht
007: menskful maiden of myht
008: feir ant fre to fonde
-49-

009: In al þis wurhliche won
010: a burde of blod & of bon
011: neuer3ete y nuste non
012: lussomore in londe
013: blow &c
014: wiþ lokkes lefliche & longe
015: wiþ frount & face feir to fonde
016: wiþ murþes monie mote heo monge
017: þat brid so breme in boure
018: wiþ lossom eye grete ant gode
019: wiþ browen blysfol vnder hode
020: he þat reste him on þe rode
021: þat leflich lyf honoure
022: Blou &c
023: hire lure lumes liht
024: ase a launterne anyht
025: hire bleo blykyeþ so bryht
026: so feyr heo is ant fyn
027: a suetly suyre heo haþ to holde
028: wiþ armes shuldre ase mon wolde
029: ant fyngres feyre forte folde
030: god wolde hue were myn
031: Middel heo haþ menskful smal
032: hire loueliche chere as cristal
033: þe3es leggos fet ant al
034: iwraht wes of þe beste.
035: A lussum ledy lasteles
036: þat sweting is & euer wes
037: a betere burde neuer nes
038: yheryed wiþ þe heste
039: heo is dereworþe in day
040: graciouse stout ant gay
041: gentil iolyf so þe Iay
042: worhliche when heo wakeþ
043: Maiden murgest of mouþ
044: bi est bi west by norþ & souþ
045: þer nis fiele ne crouþ
046: þat such murþes makeþ
-50-

047: heo is coral of godnesse
048: heo is rubie of ryhtfulnesse
049: heo is cristal of clannesse
050: ant baner of bealte
051: heo is lilie of largesse
052: heo is paruenke of prouesse
053: heo is solsecle of suetnesse
054: ant ledy of lealte
055: to loue þat leflich is in londe
056: y tolde him as ych vnderstonde
057: hou þis hende haþ hent in honde
058: on huerte þat myn wes
059: ant hire knyhtes me han so soht
060: sykyng sorewyng & þoht
061: þo þre me han in bale broht
062: a3eyn þe poer of pe'e's
063: to loue y putte pleyntes mo
064: hou sykyng me haþ siwed so
065: ant eke þoht me þrat to slo
066: wiþ maistry 3ef he myhte
067: ant serewe sore in balful bende
068: þat he wolde for þis hende
069: me lede to my lyues ende
070: vnlahfulliche in lyhte
071: hire loue me lustnede vch word
072: ant beh him to me ouer bord
073: ant bed me hente þat hord
074: of myne huerte hele
075: ant bisecheþ þat swete ant swote
076: er þen þou falle as fen of fote
077: þat heo wiþ þe wolle of bote
078: dereworþliche dele
079: for hire loue y carke ant care
080: for hire loue y droupne ant dare
081: for hire loue my blisse is bare
082: ant al ich waxe won
083: for hire loue in slep y slake
084: for hire loue al nyht ich wake
085: for hire loue mournyng y make
086: More þen eny mon
-51-

 

Brook 15; Ker 50


001: Suete iesu king of blysse
002: myn huerte loue min huerte lisse
003: þou art suete myd ywisse
004: wo is him þat þe shal misse
005: suete iesu min huerte lyht
006: þou art day wiþoute nyht
007: þen 3eue me streinþe & eke myht
008: forte louien þe aryht
009: Suete iesu min huerte bote
010: in myn huerte þou sete a rote
011: of þi loue þat is so swote
012: ant leue þat hit springe mote
013: suete iesu myn huerte gleem
014: bryhtore þen þe sonnebeem
015: ybore þou were in Bedleheem
016: þou make me here þi suete dreem
017: Suete iesu þi loue is suete
018: wo is him þat þe shal lete
019: þarefore me shulden ofte þe grete
020: wiþ salte teres & e3e wepe
021: Suete iesu kyng of londe
022: þou make me fer vnderstonde
023: þat min herte mote fonde
024: hou suete bueþ þi loue bonde
025: Swete iesu louerd myn
026: my lyf myn huerte al is þin
027: vndo myn herte & liht þeryn
028: ant wite me from fendes engyn
029: Suete iesu my soule fode
030: þin werkes bueþ bo suete & gode
031: þou bohtest me vpon þe rode
032: for me þou sheddest þi blode
-52-

033: Suete iesu me reoweþ sore
034: gultes þat y ha wroþt 3ore
035: þarefore y bidde þin mylse & ore
036: merci lord y nul namore
037: Suete iesu louerd god
038: þou me bohtest wiþ þi blod
039: out of þin huerte orn þe flod
040: þi moder hit seh þat þe by stod
041: Suete iesu bryht & shene
042: y:preye þe þou here my bene
043: þourh erndyng of þe heuene quene
044: þat my bone be nou sene
045: Suete iesu berne best
046: wiþ ich hope halbe rest
047: wheþer y be souþ oþer west
048: þe help of þe be me nest
049: Suete iesu wel may him be
050: þat þe may in blisse se
051: after mi soule let aungles te
052: for me ne gladieþ gome ne gle
053: Suete iesu heuene kyng
054: feir & best of alle þyng
055: þou bring me of þis longing
056: & come to þe at myn endyng
057: Suete iesu al folkes reed
058: graunte ous er we buen ded
059: þe vnderfonge in fourme of bred
060: ant seþþe to heouene þou vs led

 

Brook 16; Ker 51


001: Iesu crist heouene kyng
002: 3ef vs alle god endyng
003: þat bone biddeþ þe
004: at þe biginnyng of mi song
005: iesu y þe preye among
006: in stude al wher y be
-53-

007: For þou art kyng of alle
008: to þe y clepie ant calle
009: þou haue merci of me
010: þis enderday in o morewenyng
011: wiþ dreri herte ant gret mournyng
012: on mi folie y þohte
013: one þat is so suete a þing
014: þat ber iesse þe heuene kyng
015: merci y besohte
016: iesu for þi muchele myht
017: þou graunte vs alle heuene lyht
018: þat vs so duere bohtes
019: for þi merci iesu suete
020: þin hondywerk nult þou lete
021: þat þou wel 3erne sohtest
022: wel ichot ant soþ hit ys
023: þat in þis world nys no blys
024: bote care serewe & pyne
025: þarefore ich rede we wurchen so
026: þat we mowe come to
027: þe ioye wiþoute fyne

 

Brook 17; Ker 52


001: Wynter wakeneþ al my care
002: nou þis leues waxeþ bare
003: ofte y sike & mourne sare
004: when hit comeþ in my þoht
005: of þis worldes ioie hou hit geþ al to noht
006: Nou hit is & nou hit nys
007: also hit ner nere ywys
008: þat moni mon seiþ soþ hit ys
009: al goþ bote godes wille
010: alle we shule deye þaþ vs like ylle
011: al þat gren me graueþ grene
012: nou hit faleweþ al bydene
013: iesu help þat hit be sene
014: ant shild vs from helle
015: for y not whider y shal ne hou longe her duelle
-54-

 

Brook 18; Ker 53


001: When y se blosmes springe
002: ant here foules song
003: suete louelongynge
004: myn herte þourhout stong
005: al for a loue newe
006: þat is so suete & trewe
007: þat gladieþ al my song
008: ich wot al myd iwisse
009: my ioie & eke my blisse
010: on him is al ylong
011: when y miselue stonde
012: & wiþ myn e3en seo
013: þurled fot ant honde
014: wiþ grete nayles þreo
015: blody wes ys heued
016: on him nes nout bileued
017: þat wes of peynes freo
018: wel wel ohte myn herte
019: for his loue to smerte
020: ant sike ant sory beo
021: Iesu milde & softe
022: 3ef me streynþe ant myht
023: Longen sore an ofte
024: to louye þe aryht
025: pyne to þolie ant dre3e
026: for þe sone marye
027: þou art so fre ant bryht
028: mayden ant moder mylde
029: for loue of þine childe
030: ernde vs heuene lyht
031: alas þat y ne couþe
032: turne to him my þoht
033: ant cheosen him to lemmon
034: so duere he vs haþ yboht
035: wiþ woundes deope ant stronge
036: wiþ peynes sore ant longe
037: of loue ne conne we noht
038: his blod þat feol to grounde
039: of hise suete wounde
040: of peyne vs haþ yboht
-55-

041: Iesu milde ant suete
042: y synge þe mi song
043: ofte y þe grete
044: ant preye þe among
045: let me sunnes lete
046: ant in þis lyue bete
047: þat ich haue do wrong
048: at oure lyues ende
049: when whe shule wende
050: iesu vs vndefong amen
-56-

 

Brook 20; Ker 60


001: Stond wel moder vnder rode
002: byholt þy sone wiþ glade mode
003: blyþe moder myht þou be
004: sone hou shulde y bliþe stonde
005: y se þin fet y se þin honde
006: nayled to þe harde tre.
007: moder do wey þy wepinge
008: y þole deþ for monkynde,
009: for my gult þole y non,
010: sone y fele þe dedestounde
011: þe suert is at myn herte grounde
012: þat me byhet symeon,
013: moder merci let me deye
014: for adam out of helle beye
015: ant his kun þat is forlore
016: sone what shal me to rede
017: my peyne pyneþ me to dede
018: lat me de3e þe byfore
019: moder þou rewe al of þi bern
020: þou wosshe awai þe blody tern
021: hit þop me worse þen my ded,
022: sone hou may y teres werne
023: y se þe blody stremes erne
024: from þin herte to my fet
025: moder nou y may þe seye
026: betere is þat ich one deye
027: þen al monkunde to helle go,
028: sone y se þi bodi byswngen
029: fet & honden þourhout stongen
030: no wonder þah me be wo
031: moder now y shal þe telle
032: 3ef y ne de3e þou gost to helle
033: y þole ded for þine sake,
034: sone þou art so meke & mynde
035: ne wyt me naht hit is my kynde
036: þat y for þe þis sorewe make
-57-

037: moder nou þou miht wel leren
038: whet sorewe haueþ þat children beren
039: whet sorewe hit is wiþ childe gon
040: sorewe ywis y con þe telle
041: bote hit be þe pyne of helle
042: more serewe wot y nou,
043: moder rew of moder kare
044: for nou þou wost of moder fare
045: þou þou be clene mayden mon
046: sone help at alle nede
047: alle þo þat to me grede
048: maiden wif ant fol wymmon
049: moder may y no lengore duelle
050: þe time is come y shal to helle
051: þe þridde day y ryse vpon
052: sone y wil wiþ þe founden,
053: y deye ywis for þine wounden
054: so soreweful ded nes neuer non
055: when he ros þo fel hire sorewe
056: hire blisse sprong þe þridde morewe
057: blyþe moder were þou þo
058: Leuedy for þat ilke blisse
059: bysech þi sone of sunnes lisse,
060: þou be oure sheld a3eyn oure fo
061: blessed be þou ful of blysse
062: let vs neuer heuene misse
063: þourh þi suete sones myht
064: louerd for þat ilke blod,
065: þat þou sheddest on þe rod,
066: þou bryng vs into heuene lyht Amen.

 

Brook 21; Ker 61


001: Iesu for þi muchele miht
002: þou 3ef vs of þi grace
003: þat we mowe dai & nyht
004: þenken o þi face
005: in myn herte hit doþ me god,
006: when y þenke on iesu blod,
007: þat ran doun bi ys syde
-58-

008: from is herte doun to is fot
009: for ous he spradde is herte blod,
010: his wondes were so wyde
011: when y þenke on iesu ded
012: min herte ouerwerpes
013: mi soule is won so is þe led
014: for mi fole werkes
015: ful wo is þat ilke mon
016: þat iesu ded ne þenkes on
017: what he soffrede so sore
018: for my synnes y wil wete
019: ant alle y wyle hem forlete,
020: nou & euermore.
021: mon þat is in ioie & blis,
022: & liþ in shame & synne
023: he is more þen vnwis
024: þat þerof nul nout blynne
025: al þis world hit geþ away,
026: me þynkeþ hit ne3yþ domesday,
027: nou man gos to grounde
028: iesu crist þat þolede ded,
029: he may oure soules to heuene led,
030: wiþinne a lutel stounde
031: þah þou haue al þi wille
032: þenk on godes wondes
033: for þat we ne shulde spille
034: he þolede harde stoundes
035: al for mon he þolede ded,
036: 3yf he wyle leue on is red
037: ant leue his folie
038: we shule haue ioie & blis
039: more þen we conne seien ywys
040: in iesu compagnie
041: iesu þat wes milde & fre
042: wes wiþ spere ystonge
043: he was nailed to þe tre
044: wiþ scourges yswongen
045: al for mon he þolede shame
046: wiþouten gult wiþouten blame
047: boþe day & oþer
-59-

048: mon ful muchel he louede þe
049: when he wolde make þe fre
050: ant bicome þi broþer.

 

Brook 22; Ker 62


001: Y syke when y singe
002: for sorewe þat y se
003: when y wiþ wypinge
004: biholde vpon þe tre
005: ant se iesu þe suete
006: is herte blod forlete
007: for þe loue of me
008: ys woundes waxen wete
009: þei wepen stille & mete
010: marie reweþ þe
011: he3e vpon a doune
012: þer al folk hit se may
013: a mile from vch toune
014: aboute þe midday
015: þe rode is vp arered
016: his frendes aren afered
017: ant clyngeþ so þe clay ,
018: þe rode stond in stone
019: marie stont hire one
020: ant seiþ weylaway
021: when y þe biholde
022: wiþ ey3en bryhte bo
023: ant þi bodi colde
024: þi ble waxeþ blo,
025: þou hengest al of blode
026: so he3e vpon þe rode
027: bituene þeues tuo
028: who may syke more
029: marie wepeþ sore
030: ant siht al þis wo
031: þe naylles beþ to stronge
032: þe smyþes are to sleye
033: þou bledest al to longe
034: þe tre is al to hey3e
035: þe stones beoþ al wete
-60-

036: alas iesu þe suete
037: for nou frend hast þou non
038: bote seint Iohan mournynde
039: ant marie wepynde
040: for pyne þat þe ys on
041: ofte when y sike
042: & makie my mon
043: welille þah me like
044: wonder is hit non
045: when y se honge he3e
046: ant bittre pynes dre3e
047: iesu my lemmon
048: his wondes sore smerte
049: þe spere al to is herte
050: ant þourh is sydes gon
051: ofte when y syke
052: wiþ care y am þourh soht
053: when y wake y wyke
054: of serewe is al mi þoht
055: alas men beþ wode
056: þat suereþ by þe rode
057: & selleþ him for noht
058: þat bohte vs out of synne
059: he bring vs to wynne
060: þat haþ vs duere boht

 

Brook 23; Ker 63


001: Nou skrnkeþ rose & lylie flour
002: þat whilen ber þat suete sauour
003: in somer þat suete tyde
004: ne is no quene so stark ne stour
005: ne no leuedy so bryht in bour
006: þat ded ne shal by glyde
007: whose wel fleysh lust forgon
008: & heuene blis abyde
009: on iesu be is þoht anon
010: þat þerled was ys side
-61-

011: from petersbourh in o morewenyng
012: as y me wende o:my pley3yng
013: on mi folie y þohte
014: meuen y gon my mournyng
015: to hire þat ber þe heuene kyng
016: of merci hire bysohte
017: ledy preye þi sone for ous
018: þat vs duere dohte
019: ant shild vs from þe loþe hous þat to the fend is wrohte
020: þat to the fend is wrohte
021: myn herte of dedes wes fordred
022: of synne þat y haue my fleish fed
023: ant folewed al my tyme
024: þat y not whider ishal be led,
025: when y lygge on deþes bed,
026: in ioie ore into pyne
027: on a ledy myn hope is
028: moder ant virgyne
029: whe shulen into heuene blis
030: þurh hire medicine
031: betere is hire medycyn
032: þen eny mede or eny wyn
033: hire erbes smulleþ suete
034: from catenas into dyuelyn
035: nis þer no leche so fyn
036: oure serewes to bete
037: mon þat feleþ eni sor
038: & his folie wol lete
039: wiþoute gold oþer eny tresor
040: he mai be sound ant sete.
041: of penaunce is his plastre al
042: ant euer seruen hire y shal
043: nou & al my lyue
044: nou is fre þat er wes þral
045: al þourh þat leuedy gent & smal
046: heried be hyr ioies fyue
047: wherso eny sek ys
048: þider hye blyue
049: þurh hire beoþ ybroht to blis
050: bo mayden ant wyue
-62-

051: for he þat dude is body on tre
052: of oure sinnes haue piete
053: þat weldes heouene boures
054: wymmon wiþ þi iolyfte,
055: þou þench on godes shoures,
056: þah þou be whyt & bryth on ble
057: falewen shule þy floures
058: Iesu haue merci of vs
059: þat al þis world honoures Amen.

 

Brook 24; Ker 64


001: My deþ y loue my lyf ich hate for a leuedy shene
002: heo is brith so daies liht þat is on me wel sene
003: al y falewe so doþ þe lef in somer when hit is grene
004: 3ef mi þoht helpeþ me noht to wham shal y me mene
005: sorewe & syke & drery mod byndeþ me so faste
006: þat y wene to walke wod 3ef hit me lengore laste
007: my serewe my care al wiþ a word he myhte awey caste
008: whet helpeþ þe my suete lemmon my lyf þus forte gaste
009: do wey þou clerc þou art a fol wiþ þe bydde y noht chyde
010: shalt þou neuer lyue þat day mi loue þat þou shalt byde
011: 3ef þou in my boure art take shame þe may bityde,
012: þe is bettere on fote gon þen wycked hors to ryde.
013: weylawei whi seist þou so þou rewe on me þy man,
014: þou art euer in my þoht in londe wher ich am
015: 3ef y de3e for þi loue hit is þe mykel sham
016: þou lete me lyue & be þi luef & þou my suete lemman.
017: be stille þou fol y calle þe riþt cost þou neuer blynne
018: þou art wayted day & nyht wiþ fader & al my kynne
019: be þou in mi bour ytake lete þey for no synne
020: me to holde & þe to slon þe deþ so þou maht wynne
021: suete ledy þou wend þi mod sorewe þou wolt me kyþe
022: ich am al so sory mon so ich was whylen blyþe
023: in a wyndou þer we stod we custe vs fyfty syþe
024: feir biheste makeþ mony mon al is serewes mythe
-63-

025: weylawey whi seist þou so mi serewe þou makest newe
026: y louede a clerk al paramours of loue he wes ful trewe
027: he nes nout blyþe neuer a day bote he me sone se3e
028: ich louede him betere þen my lyf whet bote is hit to le3e
029: whil y wes a clerc in scole wel muchel y couþe of lore
030: ych haue þoled for þy loue woundes fele sore
031: fer from & eke from men vnder þe wode gore
032: suete ledy þou rewe of me nou may y no more
033: þou semest wel to ben a clerc for þou spekest so stille
034: shalt þou neuer for mi loue woundes þole grylle
035: fader moder & al my kun ne shal me holde so stille
036: þat y nam þyn & þou art myn to don al þi wille

 

Brook 25; Ker 65


001: When þe nyhtegale singes þe wodes waxen grene
002: lef & gras & blosme springes in aueryl y:wene
003: ant loue is to myn herte gon wiþ one spere so kene
004: nyht & day my blod hit drynkes myn herte deþ me tene.
005: Ich haue loued al þis 3er þat y may loue namore
006: ich haue siked moni syk lemmon for þin ore
007: me nis loue neuer þe ner & þat me reweþ sore
008: suete lemmon þench on me ich haue loued þe 3ore
009: suete lemmon y preye þe of loue one speche
010: whil y lyue in world so wyde oþer nulle y seche
011: wiþ þy loue my suete leof mi blis þou mihtes eche
012: a suete cos of þy mouþ mihte be my leche
013: suete lemmon y:pree3e þe of a loue bene
014: 3ef þou me louest ase men says lemmon as y wene
015: ant 3ef hit þi wille be þou loke þat hit be sene
016: so muchel y þenke vpon þe þat al y waxe grene
017: bituene lyncolne & lyndeseye norhamptoun ant lounde
018: ne wot y non so fayr a:may as y go fore ybounde
019: suete lemmon ypre3e þe þou louie me a stounde
020: y wole mone my song
021: on wham þat hit ys on ylong
-64-

 

Brook 26; Ker 66


001: Blessed be þou leuedy ful of heouene blisse
002: suete flur of parays moder of mildenesse
003: prey3e iesu þy sone þat he merede & wysse
004: so my wey forte gon þat he me neuer misse
005: of þe suete leuedy my song y wile byginne
006: þy deore suete sones loue þou lere me to wynne
007: ofte y syke & serewe among may y neuer blynne
008: leuedi for þi milde mod þou shilde me from synne
009: myne þohtes leuedy makeþ me ful wan
010: to þe y crie & calle þou here me for þi man
011: help me heuene quene for þyn euer:ycham
012: wisse me to þi deore sone þe weres y ne can
013: Leuedy seinte marie for þi milde mod
014: soffre neuer þat y be so wilde ne so wod
015: þat ich her forleose þe þat art so god
016: þat iesu me to bohte wiþ is suete blod
017: bryhte & shene sterre cler lyht þou me & lere
018: In þis false fykel world myselue so to bere
019: þat y ner at myn endyng haue þe feond to fere
020: Iesu mid þi suete blod þou bohtest me so dere
021: Leuedi seinte marie so fair & so briht
022: al myn help is on þe bi day & by nyht
023: leuedi fre þou shilde me so wel as þou myht
024: þat y neuer forleose heueriche lyht
025: leuedy seinte marie so fayr & so hende
026: preye iesu crist þi sone þat he me grace sende
027: so to queme him & þe er ich henne wende
028: þat he me bringe to þe blis þat is wiþouten ende
029: ofte y crie merci of mylse þou art welle
030: alle buen false þat bueþ mad boþe of fleysh & felle
031: leuedi suete þou vs shild from þe pine of helle
032: bring vs to þe ioie þat no tonge hit may of telle
-65-

033: Iesu crist godes sone fader & holy gost
034: help vs at oure nede as þou hit al wel wost
035: bring vs to þin riche þer is ioie most
036: let vs neuer hit misse for non worldes bost

 

Brook 27; Ker 67


001: Ase y me rod þis ender day
002: by grene wode to seche play
003: mid herte y þohte al on a may
004: suetest of alle þinge
005: Lyþe & ich ou telle may
006: al of þat suete þinge
007: þis maide is suete ant fre of blod
008: briht & feyr of milde mod
009: alle heo mai don vs god
010: þurh hire bysechynge
011: of hire he tok fleysh & blod
012: iesu heuene kynge
013: Wiþ al mi lif y loue þat may
014: he is mi solas nyht & day
015: my ioie & eke my beste play
016: ant eke my louelongynge
017: al þe betere meis þat day
018: þat ich of hire synge
019: of alle þinge y loue hire mest
020: my dayes blis my nyhtes rest
021: heo counseileþ & helpeþ best
022: boþe elde & 3ynge
023: nou y may 3ef y wole
024: þe fif ioyes mynge
025: þe furst ioie of þat wynman
026: when gabriel from heuene cam
027: ant seide god shulde bicome man
028: ant of hire be bore
029: & bringe vp of helle pyn
030: monkyn þat wes forlore
-66-

031: þat oþer ioie of þat may
032: wes o cristesmasse day
033: when god wes bore on þoro lay
034: ant brohte vs lyhtnesse
035: þe ster wes seie byfore day
036: þis hirdes bereþ wytnesse
037: þe þ4idde ioie of þat leuedy
038: þat men clepeþ þe epyphany
039: when þe kynges come wery
040: to presente hyre sone
041: wiþ myrre gold & encen3
042: þat wes mon bicome
043: þe furþe ioie we telle mawen
044: on estermorewe wen hit gon dawen
045: hyre sone þat wes slawen
046: aros in fleysh & bon
047: more ioie ne mai me hauen
048: wyf ne mayden non
049: þe fifte ioie of þat wymman
050: when hire body to heuene cam
051: þe soule to þe body nam
052: ase hit wes woned to bene
053: crist leue vs alle wiþ þat wymman
054: þat ioie al forte sene
055: preye we alle to oure leuedy
056: ant to þe sontes þat woneþ hire by
057: þat heo of vs hauen merci
058: ant þat we ne misse
059: In þis world to ben holy
060: ant wynne heuene blysse
061: amen

 

Brook 28; Ker 69


001: Mayden moder milde
002: oie3 cel oreysoun
003: from shome þou me shilde
004: e de ly mal feloun
-67-

005: for loue of þine childe
006: me menez de tresoun
007: Ich wes wod & wilde
008: ore su en prisoun
009: þou art feyr & fre
010: e plein de doucour
011: of þe sprong þe ble
012: ly souerein creatour
013: mayde byseche y:þe
014: vostre seint socour
015: meoke & mylde be wiþ me
016: pur la sue amour
017: þo Iudas iesum founde
018: donque ly beysa
019: he wes bete & bounde
020: que nous tous fourma
021: wyde were is wounde
022: qe le gyw ly dona
023: he þolede harde stounde
024: me poi le greua
025: on stou ase þou stode
026: puccele tot pensaunt
027: þou restest þe vnder rode
028: ton fitz veites pendant
029: þou se3e is sides of blode
030: l'alme de ly partaunt
031: he ferede vch an fode
032: en mound que fust viuant
033: ys siden were sore
034: le sang de ly cora
035: þat lond wes forlore
036: mes il le rechata
037: vch bern þat wes ybore
038: en enfern descenda
039: he þolede deþ þerfore
040: en ciel puis mounta
041: þo pilat herde þe tydynge
042: molt fu ioyous baroun
043: he lette byfore him brynge
044: iesu nazaroun
-68-

045: he was ycrouned kynge
046: pur nostre redempcioun
047: whose wol me synge
048: auera grant pardoun

 

Brook 29; Ker 73


001: God, þat al þis myhtes may
002: in heuene & erþe [þy] wille ys oo
003: ichabbe be losed mony a day
004: er ant late y be þy foo
005: ich wes to wyte & wiste my lay
006: longe habbe holde me þerfro
007: vol of merci þou art ay
008: al vngreyþe icham to þe to go
009: To go to him þat haþ ous boht
010: my gode deden bueþ fol smalle
011: of þe werkes þat ich ha wroht
012: þe beste is bittrore þen þe galle
013: my god ich wiste y nolde hit noht
014: in fohe me wes luef to folie
015: when y myself haue þourhsoht
016: y knowe me for þe wrst of alle
017: God þat de3edest on þe rod
018: al þis world to forþren & fylle
019: for ous þou sheddest þi suete blod
020: þat y ha don me lykeþ ylle
021: bote er a3eyn þe stiþ y:stod
022: er & late loude ant stille
023: of myne deden fynde y non god
024: lord of me þou do þy wille
025: In herte ne myhte y neuer bowe
026: ne to my kunde louerd drawe
027: my meste vo ys my loues trowe
028: crist ne stod me neuer hawe
029: ich holde me vilore þen a gyw
030: & y myself wolde bue knowe
031: Lord merci rewe me now
032: reyse vp þat ys falle lowe
-69-

033: god þat al þis world shal hede
034: þy gode myht þou hast in wolde
035: on erþe þou come for oure nede
036: for ous sunful were boht & solde
037: when we bueþ dempned after vr dede
038: a domesday when ryhtes bueþ tolde
039: when we shule suen þy wounde blede
040: to speke þenne we bueþ vnbolde
041: vnbold icham to bidde þe bote
042: swyþe vnreken ys my re'e's
043: þy wille ne welk y ner afote
044: to wickede werkes y me che'e's
045: fals y wes in crop ant rote
046: when y seyde þy lore wes le'e's
047: Iesu crist þou be mi bote
048: so boun icham to make my pe'e's
049: Al unreken ys my ro
050: louerd crist whet shal y say
051: of myne deden fynde y non fro
052: ne noþyng þat y þenke may
053: vnwrþ icham to come þe to
054: y serue þe nouþer nyht ne day
055: In þy merci y me do
056: god þat al þis myhtes may

 

Brook 30; Ker 81


001: Mon in þe mone stond & strit
002: on is botforke is burþen he bereþ
003: hit is muche wonder þat he na doun slyt
004: for doute leste he valle he shoddreþ ant shereþ
005: when þe forst freseþ muche chele he byd
006: þe þornes beþ kene is hattren to tereþ
007: Nis no wyþt in þe world þat wot wen he syt
008: ne bote hit bue þe hegge whet wedes he wereþ
009: whider trowe þis mon ha þe wey take
010: he haþ set is o fot is oþer toforen
011: For non hiþte þat he haþ ne syþt me hym ner shake
012: he is þe sloweste mon þat euer wes yboren
-70-

013: Wher he were o þe feld pycchynde stake
014: for hope of ys þornes to dutten is doren
015: He mot myd is twybyl oþer trous make
016: oþer al is dayes werk þer were yloren
017: is ilke mon vpon heh whener he were
018: wher he were y þe mone boren ant yfed
019: He leneþ on is forke ase a grey frere
020: þis crokede caynard sore he is adred
021: Hit is mony day go þat he was here
022: ichot of is ernde he naþ nout ysped
023: He haþ hewe sumwher a burþen of brere
024: þarefore sum hayward haþ taken ys wed
025: Yef þy wed ys ytake bring hom þe trous
026: sete forþ þyn oþer fot stryd ouer sty
027: We shule preye þe haywart hom to vr hous
028: ant maken hym at heyse for þe maystry
029: Drynke to hym deorly of fol god bous
030: ant oure dame douse shal sitten hym by
031: When þat he is dronke ase a dreynt mous
032: þenne we schule borewe þe wed ate bayly
033: is mon hereþ me nout þah ich to hym crye
034: ichot þe cherl is def þe del hym todrawe
035: ah ich 3e3e vpon heþ nulle nout hye
036: þe lostlase ladde con nout o lawe
037: Hupe forþ hubert hosede pye
038: ichot þart amarscled into þe mawe
039: ah me teone wiþ hym þat myn teh mye
040: þe cherld nul nout adoun er þe day dawe

 

Brook 31; Ker 92


001: Lvtel wot hit anymon
002: hou loue hym haueþ ybounde
003: þat for vs o þe rode ron
004: ant bohte vs wiþ is wounde
005: þe loue of him vs haueþ ymaked sounde
006: ant ycast þe grimly gost to grounde
007: Euer & oo nyht & day he haueþ vs in is þohte
008: he nul nout leose þat he so deore bohte
-71-

009: he bohte vs wiþ is holy blod
010: what shulde he don vs more
011: he is so meoke milde & good
012: he na gulte nout þerfore
013: þat we han ydon yrede we reowen sore
014: ant crien euer to iesu crist þyn ore
015: Euer & oo nyht & day &c.
016: He seh his fader so wonder wroht
017: wiþ mon þat wes yfalle
018: wiþ herte sor he seide is oht
019: whe shulde abuggen alle
020: his suete sone to hym gon clepe & calle
021: & preiede he moste deye for vs alle
022: Euer & oo &c.
023: He brohte vs alle from þe deþ
024: & dude vs frendes dede
025: suete iesu of nazareth
026: þou do vs heuene mede
027: vpon þe rode why nulle we taken hede
028: his grene wounde so grimly conne blede
029: Euer & oo &c.
030: His deope wounden bledeþ fast
031: of hem we ohte munne
032: he haþ ous out of helle ycast
033: ybroht vs out of sunne
034: For loue of vs his wonges waxeþ þunne
035: his herte blod he 3ef for al monkunne
036: Euer & oo &c.

 

Brook 32; Ker 93


001: Lutel wot hit anymon
002: hou derne loue may stonde
003: bote hit were a fre wymmon
004: þat muche of loue had fonde
005: þe loue of hire ne lesteþ nowyht longe
006: heo haueþ me plyht & wyteþ me wyþ wronge
007: Euer & oo for me leof icham in grete þohte
008: y þenche on hire þat y ne seo nout ofte
-72-

009: y wolde nemne hyre today
010: ant y dorste hire munne
011: heo is þat feireste may
012: of vch ende of hire kunne
013: bote heo me loue of me heo haues sunne
014: who is him þat loueþ þe loue þat he ne may ner ywynne
015: Euer & oo &c.
016: Adoun y fel to hire anon
017: ant crie ledy þyn ore
018: ledy ha mercy of þy mon
019: lef þou no false lore
020: 3ef þou dost hit wol me reowe sore
021: loue dreccheþ me þat y ne may lyue namore
022: Euer & oo &c.
023: mury hit ys in hyre tour
024: wyþ haþeles & wyþ heowes
025: so hit is in hyre bour
026: wiþ gomenes & wiþ gleowes
027: Bote heo me louye sore hit wol me rewe
028: wo is him þat loueþ þe loue þat ner nul be trewe
029: Euer & oo &c.
030: Fayrest fode vpo loft
031: my gode luef y þe gre'e'te
032: ase fele syþe & oft
033: as dewes dropes beþ we'e'te
034: ase sterres beþ in welkne ant grases sour ant suete
035: whose loueþ vntrewe his herte is selde se'e'te
036: Euer & oo &c.

 


 

About the electronic version

The Harley lyrics
Anonymous
Conversion to TEI-conformant markup: Universityof Virginia Library Electronic Text Center
editor: Frances McSparran ca. 750 kilobytes :
http://etext.virginia.edu/mideng.browse.html, AnoHarl

     Available from: Oxford Text Archive, OTA U-1681-A
1993
Note: The electronic text was created from new transcriptions of the lyrics from the EETS facsimile of Harley 2253. The transcriptions were made by students at the University of Michigan under the direction of Frances McSparran, and were corrected by Meredith Jones. Since they are new transcriptions, they may not match Brook's edition (see below) in all respects. Words joined in the MS ("itelle") have been separated by a colon ("i:telle"). The lyrics have been numbered and paginated to conform to Brook's printed edition by the University of Virginia Electronic Text Center. References are by lyric number (as in Brook), followed by line number.

 

 

About the print version

Facsimile of British Museum MS. Harley 2253
With an introduction by: N. R. (Neil Ripley) Ker xxiii, [194] p. 32 cm.
Published for the Early English Text Society by: Oxford University PressLondon and New York 1965 Early English Text Society (Series). Original series ; 255
The Harley lyrics : the Middle English lyrics of Ms. Harley 2253
edited by: G. L. Brook x, 125 p. : facsims. ; 25 cm. : Manchester University PressManchester, Eng. 1948 Publications of the University of Manchester, English series, no. 302

     Prepared for the University of Virginia LibraryElectronic Text Center


Published: c. 1310

Middle Englishfiction, poetry

 

 

Revisions to the electronic version

July 3, 1995 David Seaman, Electronic Text Center, University of Virginia Library.
Lyric 14: line 34 erroneous; moved to line 41, where itbelongs. Missing line 34 supplied. Error reported by Fritz Kemmler,University of Tuebingen.:

February 9, 1994 Edward Gaynor, University of Virginia Library, Cataloging Services Dept.
TEI header completed:

January 1994 David Seaman, University of Virginia Library Electronic Text Center
Brought the tagging into line with the OTA.DTD, and parsed:

November 1993 Kelly Tetterton, University of Virginia Library Electronic Text Center
paginated to G.L. Brook's edition of The Harley lyrics (Manchester : Manchester University Press, 1948); the poems have been renumbered to match those of Brook's edition; note that because only English lyrics were transcribed, lyric #19 is not included.:

June 1993 Peter J. Kastor, University ofVirginia Library Electronic Text Center
TEI SGML taggingadded; UVA header added:

etext@virginia.edu. Commercial use prohibited; all usage governed by our Conditions of Use: http://etext.lib.virginia.edu/conditions.html

 


Aerius, 2004


.